【台文羅馬字–白話字】
Tâi-oân sio̍k-gān pâi-á ê kò͘-sū
Ùi 2021 nî ê ē-pòaⁿ-nî ū chéng-lí Tâi-oân sio̍k-gān ê siūⁿ-hoat, jî-chhiáⁿ sī beh iōng Tâi-bûn lâi chò, m̄-koh góa ê Tâi-bûn lêng-le̍k si̍t-chāi bô hó, só͘-í iau-chhiáⁿ iú-chì lâi tàu-sio-kāng. Sio̍k-gān ê bāng-chām to̍h án-ne kiàn-li̍p khí-lâi–ah.
Kòe 2, 3 ê goe̍h liáu-āu, ū iú-chì thê-gī, “nā-sī ū siaⁿ-im, eng-kai tùi ha̍k-sip koh-khah ū pang-chān, m̄-to̍h sī khòaⁿ-bô chiah beh ha̍k-sip”. Só͘-í thê-gī ê iú-chì koh chhōe koh-khah chē ê iú-chì lâi chham-ú, goán ka-tī siá bûn-kó kap lo̍k-im, hō͘-siōng tàu-sio-kāng khòaⁿ kap thiaⁿ kám-ū têng-tâⁿ ê só͘-chāi.
2021 nî-té, siūⁿ-beh kì-liām chia chò-kòe ê tāi-chì, só͘-í chò chi̍t-pún 2022 nî ê goe̍h-le̍k hō͘ iú-chì. Kin-nî siūⁿ-kóng nā-sī chi̍t-pêng sńg pâi-á, chi̍t-pêng o̍h sio̍k-gān, eng-kai mā-sī kài-hó. Só͘-í chiah ē siūⁿ-beh chò sio̍k-gān ê pâi-á.
Chi̍t-tiuⁿ pâi-á chi̍t-kū sio̍k-gān, in-ūi pâi-á chhùn-chhioh ê hān-chè, só͘-í kan-na ū sio̍k-gān ê “Tâi-bûn lô-má-jī”, “Tâi-bûn hàn-jī” kap “nn̄g-ê QRCODE”, sàu QRCODE liáu-āu, ē-sái liâm khì hit-kù sio̍k-gān ê bāng-chām kap Youtube, sio̍k-gān ê bāng-chām kap Youtube mā hō͘-siōng ū kiat-liân. Goán ǹg-bāng ē-sái ū koh-khah chē ê ha̍k-sip ê hong-sek, mā hi-bāng chia ê hong-sek ē-tàng hō͘ ta̍k-ê ha̍k-sip ê sî-chūn tú tio̍h khah chió ê khùn-lân.
Pún-té siūⁿ-beh iōng bō͘-khoán ê hong-sek , m̄-koh bō͘-khoán pêng-tâi su-iàu ê chu-liāu, khó-lêng ài koh khai khah-chē sî-kan kap sêng-pún, só͘-í to̍h hòng-khì, kái iōng google piáu-toaⁿ ê hong-sek.
Nā-sī lí siūⁿ-beh chi-chhî goán, ē-sái siá ē-bīn ê piáu-toaⁿ. Sui-jiân ū Twitter ê pêng-iú thê-gī beh kià-hù goán, m̄-koh goán sī iōng thui-kóng ê sim-thài lâi chò chit-kiāⁿ tāi-chì, só͘-í bô siūⁿ kià-hù ê tāi-chì, mā to-siā ū kià-hù siūⁿ-hoat ê pêng-iú, chhiáⁿ kap goán tàu soan-thoân to̍h hó.
Pió-toaⁿ bāng-liān：https://t.co/qYzHvZbcui
【台文漢字】
台灣俗諺牌仔的故事
對2021年的下半年有整理臺灣俗諺的想法，而且是欲用台文來做，毋過我的台文能力實在無好，所以邀請有志來鬥相共。俗諺的網站就按呢建立起來–矣。
過2，3个月了後，有有志提議，「若是有聲音，應該對學習閣較有幫贊，毋就是看無才欲學習」。所以提議的有志閣揣閣較濟的有志來參與，阮家己寫文稿佮錄音，互相鬥相共看佮聽敢有重耽的所在。
2021年底，想欲紀念遮做過的代誌，所以做一本2022年的月曆予有志。今年想講若是一爿耍牌仔，一爿學俗諺，應該嘛是蓋好。所以才會想欲做俗諺的牌仔。
一張牌仔一句俗諺，因為牌仔寸尺的限制，所以干焦有俗諺的「台文羅馬字」、「台文漢字」佮「兩个 QRCODE」，掃 QRCODE 了後，會使連去彼句俗諺的網站佮 Youtube，俗諺的網站佮 Youtube 嘛互相有結連。阮向望會使有閣較濟的學習的方式，嘛希望遮个方式會當予逐个學習的時陣拄到較少的困難。
本底想欲用募款的方式，毋過募款平台需要的資料，可能愛閣開較濟時間佮成本，所以就放棄，改用 google 表單的方式。
若是你想欲支持阮，會使寫下面的表單。雖然有 Twitter 的朋友提議欲寄付阮，毋過阮是用推廣的心態來做這件代誌，所以無想寄付的代誌，嘛多謝有寄付想法的朋友，請佮阮鬥宣傳就好。
【中文字】
台灣俗諺撲克牌的故事
從2021年下半年開始有整理台灣俗諺的想法，而且是希望用台文來表達，但是我的台文能力實在不足，於是邀請了夥伴來協助。就這樣俗諺網站就成立起來了。
過了二三個月，有夥伴提議，「如果有聲音，應該更可以協助學習，畢竟就是看不懂文字才需要學習」。所以提議的夥伴又邀請了更多夥伴加入寫稿及錄音的行列，我們自己寫文稿和錄音，彼此互相看跟聽是否有錯誤的地方。
2021年底，想紀念這些做過的事情，所以製作了2022年的月曆送給夥伴們。今年想說或許可以一邊玩撲克牌，一邊學習俗諺，也是不錯的概念。於是有了俗諺撲克牌的想法。
一張撲克牌一句俗諺，因為版面有限，所以僅有俗諺的「台文羅馬字」、「台文漢字」以及「兩個QRCODE」，掃描QRCODE後，可以連結到該句俗諺的網站及 Youtube ，俗諺網站及 Youtube 彼此也有互相連結。我們期望讓學習的方式更多元，也希望透過更多方式降低大家學習的門檻。
原本想用群眾募資的方式，但考量到募資平台要求的資料，可能需要花費更多時間及成本，所以放棄用群眾募資的方式，改用google表單的方式。
如果您想支持我們，可以填寫以下表單。雖然有推友提議用捐款的方式贊助我們，不過因為我們是用推廣的心態來做這件事，所以沒有想到這個部分，也感謝有這樣想法的推友，請多幫我們宣傳就好。